ijo mi | sitelen | pali mi | esun
ilo nena li ken pana e sitelen "Unicode" pi sitelen pona tawa ilo sona. ona li jo e sona pi sitelen pona ali.
ilo lawa "CH32V003" li lawa e ilo nena. lawa ni li jo e ma 16kB taso. ni li lili. sitelen pona li jo e sitelen ~200. sona ni li suli li ike. tan ni la mi wile lili e ona.
ilo sitelen la suli 128x32. ni la ken suli pi sitelen li suli 32x32. taso mi kepeken sitelen pi suli 15x15. ni la sitelen li moku e ma lili pi ilo lawa.
poka li jo ala e sitelen la ona li kama weka. ni li ken lili e sitelen:
sitelen wan li kama sitelen lili mute. sitelen lili ni li ken sama. ni la mi sitelen e sitelen lili lon tenpo wan taso.
nanpa loje la o sitelen e ijo sin! nanpa laso la o sitelen kepeken sitelen lili pi tenpo pini:
nasin ni la sitelen li kama tu. sitelen nanpa wan en sitelen nanpa tu li sama la, o sitelen e sitelen nanpa wan taso:
mi pilin e ni: nasin ni li nasa li musi mute! "ona li sama! o sitelen ala!" xD
ni li nasin sitelen. sona pi sitelen ni li [28FEFF0210333302F0]:
nasin lili pi jan ante:
nasin mi li pona mute a! ona li ken lili e sitelen. kin la nasin mi li moku e ma namako "452 bytes" taso. ni li lili a! mi pilin e ni: nasin "zlib" li wile moku e ma namako mute.
mi lili e sitelen la ilo nena li wile lukin e sitelen lili kepeken tenpo mute.
taso mi kepeken ilo nena la mi kama sona e ni: tenpo mute ni li ike ala. ilo lawa pi ilo nena li pali e mute kepeken tenpo lili.
ilo nena li jo e nasin sitelen leko lili 15x15. jan Osi li pali e ona. pona tawa ona a!
sina lukin e lipu ni. pona tawa sina. sina wile lukin e ijo ante pi ilo nena la o lukin lon anpa:
(C) 2025 jan Sate li pali e lipu ni