ijo mi | sitelen | pali mi | esun
toki! ni li nimi mute mi pi nanpa wan pi toki pona lon lipu mi. tenpo suno ni la mi pana e kalama musi "mi ken ala moli e pipi" tawa jan ali a! tenpo suno luka tu wan la mi pali e kalama musi e sitelen tawa. tenpo pi mute wan la mi pali e sitelen tawa a!
tenpo pini pi tenpo sike ni la mi pali e kalama musi mute tan tenpo "Global Game Jam 2018". kalama musi wan pi ona mute li pona mute tawa mi. mi pona e kalama musi ni li pali e sitelen tawa pi kalama musi ni li pana e sitelen tawa ni tawa jan ali.
tenpo pini la mi pali e kalama musi. taso mi pana ala e ijo ni tawa jan ali. jan jo ala e ijo ni la ona li ken ala ante e kalama musi.
tenpo ni la mi pana e ijo ni pi kalama musi tawa jan ali a! sina ken ante e kalama musi ni.
o lukin e sitelen tawa ni pi kalama musi lon lipu Jutu!
sina ante e sitelen tawa e kalama musi la o toki e mi. ona li pona la mi wile pana e lupa pi pali sina lon lipu ni a!
lipu lawa pi "CC BY 4.0" li lawa e sina la sina ken kama jo e ijo lon sewi lipu.
sina wile ante e kalama uta la o kepeken e ijo "kalama musi" anu "kalama musi pi kalama uta". sina pini kalama uta la o kama jo e ijo "kalama musi weka kalama uta" kepeken ilo sona kalama. ilo sona kalama li ilo "Audacity" anu ijo ante. ijo "kalama musi weka kalama uta" en kalama uta sina li kalama musi pi kalama uta sina.
sina ken kalama uta e nimi mute pi kalama musi ni kepeken toki ante a!
sina wile ante e nimi toki la sina ken kama jo e ijo "sitelen tawa weka nimi Inli" e ijo "nimi pi toki Inli pi sitelen tawa". sina pini ante e ijo "nimi pi toki Inli pi sitelen tawa" kepeken ilo "Aegisub" la sina ken pali e sitelen tawa sin kepeken e ilo "FFMPEG" anu ilo ante. sina jo e sitelen tawa pi nimi pi toki ante a!
sina pana e ijo tan "Aegisub" tawa sitelen tawa lon Jutu la jan ali li ken lukin e nimi pi toki sina a!
nasin nanpa wan li ni: sina wile kepeken e ilo "LMMS". o kama jo e ijo "ijo pi kalama musi pi ilo "LMMS"". sina pini lukin e nimi mute lon ona la o kama jo e "kalama uta". tenpo ni la sina ken ante e kalama musi ni.
nasin nanpa tu li ni: sina kama jo e ijo "kalama musi" e ijo "kalama musi weka kalama uta" e ijo "kalama musi pi kalama uta". sina namako e kalama musi ni kepeken ilo sona kalama.
nimi mute pi kalama musi ni li toki pona. :P
nimi mute li pona lili. sitelen lukin li pona mute. o lukin e sitelen ni:
mi kepeken e ilo mute a! mi wile ala toki e ilo ali. mi toki e musi ona.
mi pali e kalama lili kepeken e ilo "Palette MCT". mi wile kepeken e ilo "Wine" lon ilo "Linux" tan ni: ilo "Linux" li ken ala kepeken e ilo "Palette MCT".
mi pali e sitelen kepeken ilo "Inkscape". ilo "Inkscape" pana e sitelen, tawa ilo "Synfig". mi pali e sitelen tawa kepeken e ilo "Synfig". mi kama sona e ilo ni kepeken tenpo suno wan kepeken sitelen tawa ni: [sitelen tawa "How to create animation in Synfig (3rd edition)"]. ona li pona mute.
ilo "Synfig" li pona. taso tenpo mute la mi pali e sitelen tawa kepeken ona. mi pini pali la ona li pali e sitelen tawa kepeken tenpo mute mute.
mi pini pali e sitelen tawa ni la mi pali e ilo sona musi.
pali pi sitelen tawa li pona tawa mi. pali ni li musi. taso mi pali e ona kepeken tenpo mute mute. mi jo e tenpo sin la mi wile pali sitelen tawa sin.
(C) 2025 jan Sate li pali e lipu ni