lipu pi jan Sate

toki ante: TOK | QSS | EN

ijo mi | sitelen | pali mi | esun

lipu Sate li kama sin!

2025-01-19 | ijo sin pi lipu Sate
sitelen ni kepeken toki ante li lon:

jan ali o! mi ante suli e lipu Sate "sadale.net". tenpo ni la lipu Sate li kama sin!

tenpo pini la lipu Sate li lukin sama lipu pi pali mani. tenpo ni la lipu Sate li lukin sama lipu jan. kin la jan li ken lukin e lipu Sate sin kepeken toki pona kepeken toki ante.

mi ante e lipu Sate tan seme?

tenpo pini la mi jan lili li pali e lipu Sate. tenpo ni la mi kama suli. mi kama jan ante. lipu Sate en mi li kama sama ala.

tenpo pini la mi pali e lipu Sate tan ni: mi jan lili. mi sona ala e nasin ni: mi kama jo e mani. mi wile e wawa e mani kepeken lipu Sate.

tenpo ni la mi kama jo e mani kepeken nasin ante. lipu Sate li ijo musi taso. ona li ijo pi mani ala.

kin la mi kama sona e toki pona li pali e nasin sitelen Sate. tenpo pini la lipu Sate li toki Inli taso. tenpo ni la lipu Sate li ken toki pona li ken sitelen Sate.

tenpo mute la mi wile ante e lipu Sate. tenpo pini lili la mi jo e tenpo. tan ni la mi ante e ona.

lipu Sate pi tenpo pini

tenpo nanpa tu wan la mi ante e lipu Sate. sitelen anpa la kulupu tu wan li lon. sitelen sewi li lipu suli pi lipu Sate. sitelen anpa li sitelen pi nimi mute:

sitelen pi lipu Sate pi tenpo pini en sitelen pi lipu Sate pi tenpo ni

sina ken lukin e lipu Sate pi tenpo pini en tenpo ni lon ma ni:

seme li ante?

ante: nasin sin pi pali lipu li lon

tenpo pini la lipu Sate li kepeken nasin Sanko "Django". jan li wile lukin e lipu Sate la, ilo Sanko li alasa e sona tan poki sona "SQL" li pana e lipu tawa jan.

tenpo ni la mi pali e lipu ".md" mute kepeken ilo sona mi. kepeken ilo "Python" la lipu ".md" ni li kama lipu ".html". jan li wile lukin e lipu Sate la, ona li lukin e lipu ".html" ni.

ni li sitelen insa lipu ".md":

Title: toki a!
Date: 2015-01-01
Series: meta

jan ali o! lipu Sate li kama lon!

tenpo ni la mi pali e ilo sin. nimi ona li ilo Kijetesantakalu: [kulupu sitelen pi ilo Kijetesantakalu]($_kijetesantakalu_url)!

sina sona e toki Inli la o kepeken lipu ni: [Blogpost Series of Project Kijetesantakalu]($en_kijetesantakalu_url)

lipu Sate pi tenpo pini li kepeken nasin pi pona lukin "Semantic UI". lipu Sate pi tenpo ni li kepeken ala nasin pi pona lukin.

ante: toki ante li ken

ante: toki ante li ken: lipu wan li jo e toki wan taso

tenpo pini la sitelen pi toki wan taso li ken lon. mi wile e toki tu lon sitelen wan la, toki tu li wile lon lipu sama. o lukin e ni:

toki tu li lon lipu sama

ni li ike suli a! jan pi toki Inli li sona ala e toki pona. jan pi toki pona li sona ala e toki Inli. jan ali li lukin e sitelen pi sona ala!

tenpo ni la lipu wan li jo e toki wan taso. o lukin e ni:

toki pona taso li lon

ni li pona. jan pi toki pona li ken lukin kepeken toki pona taso. jan pi toki Inli li ken pilin e nena li kepeken toki Inli.

ante: toki ante li ken: toki seme li ken?

tenpo ni la lipu Sate li ken jo e toki pona (TOK) e sitelen Sate (QSS) e toki Inli (EN)

sitelen Sate li nasin sitelen pi toki Kanton. mi pali e sitelen Sate lon tenpo pini. sina ken lukin e ijo pi sitelen Sate lon ma ni:

ilo pi pali lipu mi li ken ante e sitelen Lasin tawa sitelen Sate. o lukin:

sitelen Lasin li kama sitelen Sate

ante: toki ante li ken: sitelen pi tenpo pini

tenpo pini la sitelen mute li jo e toki Inli taso. mi wile pana e toki pona e sitelen Sate tawa ona lon tenpo kama. taso ni li pali mute. mi wile kepeken tenpo mute. sina o awen pona!

ante: toki ante li ken: sitelen sin

lipu Sate la sitelen sin ali li wile jo e toki pona e sitelen Sate e toki Inli.

ante: nasin sin pi kulupu sitlen li lon

tenpo pini la sitelen wan li ken jo e kulupu mute. ni li sama nasin ni: #musi #tokipona #ilosona

tenpo ni la sitelen wan li ken jo e kulupu wan taso. ona kin li ken jo ala e kulupu.

kulupu li lon la jan li ken lukin e sitelen pi kulupu sama lon anpa sitelen.

ante: lipu sin

ni li lon sewi pi lipu Sate pini:

nena sewi lon lipu Sate pi tenpo pini

ni li lon sewi pi lipu Sate sin:

nena sewi lon lipu Sate pi tenpo ni

lipu sin li kama lon! lipu "ijo mi" en lipu "pali mi" en lipu "esun" li kama lon!

lipu "ijo mi" li lipu suli. o lukin:

lipu suli pi lipu Sate sin

lipu suli ni li musi mute sama lipu jan pi tenpo pini. sitelen tawa li lon. kalama musi li lon. sitelen lili mute li lon anpa.

ante: seme li weka?

ante: weka: poki toki

lipu Sate pini li jo e poki toki. jan ali li ken toki lon anpa sitelen.

taso jan ala li toki. ilo ike mute li toki.

tan ni la mi weka e poki toki lon lipu Sate sin.

ante: weka: sona namako ilo

jan li ken lukin e lipu Sate. ilo kin li ken lukin e lipu Sate. ilo li lukin e lipu Sate la ona li wile lukin e sona namako ilo.

lipu Sate pi tenpo pini li jo e ona. taso lipu Sate sin li jo ala e ona tan ni: mi wile e jan e ilo ala.

ante: weka: ilo lukin

lipu Sate pini li jo e ilo lukin "Google Analytics". mi ken kama sona e ni: jan seme li kepeken lipu mi?

taso sona ni li kepeken ala tawa mi. tan ni la mi weka e ona.

pini!

ni li pini. tenpo ni la lipu Sate li kama sin. lipu Sate sin li sama ala lipu pi kulupu pali. lipu Sate sin li ijo musi. ike ali li weka. lipu Sate li kama pona.

lipu Sate o pona! sina o pona! ali o pona!


sina ken pana e sitelen ni tawa jan ante kepeken nimi ni: lipu Sate li kama sin!

sitelen pi kulupu "ijo sin pi lipu Sate":

o lukin e sitelen ante!